تحت الټهديد
لعمو حسين ميجيش أخدها مشي ولا إيه عشان يعجبك!
_أنت بتمثلي الغباء ولا إيه
ولا دي من ضمن مواهبك المتعددة!
_أمشي أنا هوصلك
_لا شكرا
_مش بعرض عليكي على فكرة
كټفت دراعي_وأنا مش عايزة
_مش بمزاجك
_خلاص مش راحة الكلية النهاردة
اتلفت ونويت امشي وقولت_مالك مش فاهمة كل شوية تشدني منه بينك وبينه تار ولا حاجة عرفني يمكن أحل الموضوع بينكوا!
ضحك
والحقيقة ضحكته خلتني اركن كل عصبيتي وزهقي وتوتري على جنب وأفضل اتأمل فيه بملامح والهة..
سكت وبصلي بعد ما لاحظ تأملي ليه لوهلة حسيت بعيونه بتلمع ولكنه تمالك نفسه بسرعة واتبدلت ملامحه للجمود وكإنه مصمم يبني حواجز بينا.
_ليه
_عشان جوزك مثلا
_على الورق
اتلفت وبصلي بسخرية_ما دي كانت اقصى امنياتك وأهو اتحققت ولا إيه
_سليم...
قولتها برجاء ضعيف
إنه كفاية يجلد فيا
كفاية إني كارهة نفسي ومبقدرش أبص في المراية بسبب الوضع اللي حطيته فيه.
لانت ملامحه وحسيته اتأثر بنظرتي ولكنه رجع تاني وقال بقسوة_إيه بكدب
اتنهدت بألم_لا مبتكدبش
قولتها وسبقته وركبت في العربية فضل واقف مكانه شوية متابعني بمشاعر متضاربة كإنه بيصارع حاجة جواه وبعدين حط نضارته الشمس على عينه وركب هو كمان طول الطريق حاولت محتكش بيه على قد ما أقدر
فضلت ساندة على الازاز بتأمل الطريق بحزن
تخيل لما يكون مفيش غير خطوتين بينك وبين أكتر شخص بتحبه واتمنيته ولكن في الحقيقة الخطوتين دول
مسافة كبيرة
كبيرة جدا لدرجة متتخطاش..
يتبع...
تحت_التهديد
منة_ممدوح_البنا
